eSefarad

Keridos amigos, aki toparash el teksto de la emisyon ke ize el 23/6, i ke no vos pude embiyar mas antes, syendo ke mi ordinador era roto. Para azer la emisyon, fue un suspense a la Hitchcock: aviya eskrito mi teksto, ama dainda no lo aviya imprimado kuando se bozdeo mi ordinador myerkoles a la tadre. Enfin vino uno djueves demanyana para enderecharlo, i lo tomo i se fue kon el. Reusho a salir mi teksto de emisyon i imprimarlo. I vino kon moto a mi kaza para traerlo a 15 y 30h. Tuve djusto el tyempo de tomar el metro para toparme a las 16 a la radyo para azer mi emisyon… i  vyernes vino traerme el ordinador reparado, salvo ke todos mis emails se muryeron. Kapara…

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

SALVADORES DE DJUDYOS

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

De kualo avlarvos oy ? A poko a poko, mos estamos aserkando de las fyestas de Tishri i uvyera sido byen ke vos empese de avlar de Rosh Ashana i de Kipur. Ama una vez mas vos akodro ke ni so haham, ni tengo konosensyas bastante ondas para pueder ensenyarvos kozas muevas ke no vos dishe. Lo poko ke se, ya lo dishe en mis emisyones de los anyos pasados.

De la misma manera, esta emisyon yamandose Muestra lingua, uvyera sido byen si de vez en kuando, vos avlariya no solo en muestra lingua, ama tambyen de muestra lingua, komo lo aziya tanto byen el profesor Sephiha antes de mi. Ama yene aki vos tengo de akodrar ke yo ni so profesor ni se kozas de dizirvos en linguistika ke no sepash mijor de mi.

Lo mijor ke yo sepa azer es kontarvos istoryas de la vida de los djudyos. Munchas vezes aki vos avli de los ke salvaron, o si no salvaron, a lo manko ayudaron a djudyos durante la gerra. Aki vos avli de estas mujeres , bivdas o divorsyadas, ke me eskondyeron durante la gerra i ansina me salvaron la vida : Mme Sauty, Mme Carayol, Mme Gasset. Tambyen vos avli de munchos diplomatos de varyas nasyonalidades, el mas famozo syendo Raoul Wallemberg, ke salvaron a miles de djudyos. Tambyen vos avli de la Kuatrena Armada Italyana ke dyo su proteksyon a los Djudyos del tyempo ke okupava la Fransya. I vos avli del rolo ke djugaron tres kapos italyanos, Vidau, Ambrosio i Bastianini, serka de Mussolini el 17 de marso 1943, obtenyendo de el ke no achete la demanda de los almanes de aferrar a los djudyos. I vos avli tambyen del refuzo del mayor i del ovispo de una isla grega, Zante, de dar a los almanes la lista de los djudyos de la Isla. Otra vez vos avli de los arnautes muzulmanos ke eskondyeron a los djudyos de Albaniya, ets.

Oy pensi de avlarvos de Polakos ke salvaron a djudyos.  Ya savemos, malorozamente, ke la povlasyon polaka, i mismo la rezistansya polaka, no amostraron muncha simpatiya verso los djudyos durante la gerra, al punto mismo de azer en Kielce, el 4 de julyo 1946, un anyo despues de la gerra, un pogrom ande ovreros, pulizes i soldados mataron a 42 djudyos, lo mas aharvandolos a muerte, i firyeron a 40 otros. Ama djustamente esto da indimas valuta a los pokos polakos ke al kontraryo lucharon para ayudar i salvar a djudyos.

Ama antes de estos polakos, vos kyero kontar sovre un italyano i un alman. El uno komo el otro son muy konosidos, ama no por lo ke izyeron en favor de los djudyos.

Empesaremos por el Italyano. Kada uno ke se intéressa al Tour de France se akodra de un grande kampeon italyano de bisikleta, yamado Gino Bartali, ke gano el Tour de France dos vezes (1938 i 1948) i el giro d’Italia tres vezes. Yo, en todo kavzo, me akodro muy byen de el. Yo teniya onze anyos kuando gano en 1948 i me interesava muncho, en este tyempo, al Tour de France.

Giorgio Nissim

Este grande kampeon se muryo en 2000 a la edad de 86 anyos. Tres anyos mas despues, en 2003, se muryo tambyen un djudyo yamado Giorgio Nissim. Sus ijos, mirando en los papeles del defunto, toparon ke este Nissim aviya organizado durante la gerra, kon el ayudo de relijyozos katolikos, una red para azer fuyir de Italia a syenes de djudyos (800 en todo) grasyas a falsos papeles. I kyen transportava los falsos papeles de un lado a otro ? Gino Bartali, ke iva por karreteras i montanyas para su entrenamyento sportivo. Dinguno pensava ke en vedra el kampeon transportava falsos papeles eskondidos en su bisikleta.

Yene fue sospechado por las Kamizas Negras porke se vido ke frekuentava monasteryos konosidos por luchar kontra los fasistos. Bartali  fue yevado a la Villa Trieste, famoza por sus interrogatoryos i sus torturas, i aya le ordenaron de no irse mas a estos monasteryos. El respondyo ke dinguno podiya impedirle de korrer ande keriya, i kontinuo su aksyon, savyendo ke era tan famozo ke dinguno tendriya la ozadiya de meterlo en prezo.

Kuando s’eskapo la gerra Bartali no disho a dingunos lo ke aviya echo para los djudyos, i se muryo sin ke se sepa. Son los ijos de Giorgio Nissim ke salyeron la koza kuando la deskuvrieron tres anyos despues de su muerte.

Ay un otro ombre ke no avlo tampoko de su rolo en favor de los djudyos antes de la gerra i durante la gerra, es un Alman tambyen famozo, kyero avlar de Ernst Leitz, amo de la kaza Leica de makinas de foto, de todos konosidas por sus kualidades en optika.

Pishin kuando Hitler viene al poder en 1933 i ke se ataka a los djudyos, eyos pensan de fuirse de Almanya, ama ande irse i kualo azer aya ? Por los empyegados de las fabrikas Leica i para sus famiyas,i mismo sus amigos, Leitz los embiya lavorar en los paizes ande ay botikas Leica, en Fransya, Ingletyerra, Hong Kong, Estados Unidos, ets.

Despues de la Noche de Kristal, en 1938, ay mas munchos de djudyos ke bushkan de fuirse, i Leitz los ayuda lo mas ke puede, los paga asta ke topen lavoro en un muevo pais, i de esta manera ayuda a syenes de djuyos a fuir.

En 1939 la gerra empesa i la Almanya sierra sus fronteras. Yene Leitz aze su posivle para permeter a djudyos de fuir de Almanya.

Su ija, Elsie Kuhn-Leitz, es aferrada por la Gestapo a la fronterra de la Suisa, aprovando de ayudar a mujeres djudiyas de pasar la frontera. Va soportar interrogatoryos komo pueden ser los de la Gestapo, antes de ser finalmente liberada.

A propozito de los Almanes, miri el lunes 12 de septyembre a la noche a la televizyon un dokumentaryo fantastiko sovre  Almanes, unos kuantos desendyentes de nazis, komo el bizsovrino de Goering, otros no, ke dechidaron de ir a bivir en Israel i ,por lo mas munchos, de azerse djudyos i kazarse kon djudiyas. Ay mismo un kazal en Galilea yamado Migdal ande moran munchos de eyos. Agora avlan ebreo, tyenen pasaportes israelyanos, i mismo kuando eyos mismos no se izyeron djudyos, tyenen ijos djudyos i israelyanos…

Ama esto es una otra istorya. Agora vengo a lo ke vos aviya dicho, la istorya de Polakos ke salvaron a djudyos : vos kyero avlar de Irena Sendler, ama tambyen de Jan Zabinski i de Wladyslaw Kowalski.

Empesaremos por una de las djustas la mas famoza, Irena Sendler.Esta mujer, nasida Krzyzanowska en 1910 en Varsovia, era ija de un mediko ke se okupava de kurar a los proves.

Kuando los Almanes entran en Varsovia en 1939, tyene 29 anyos. I pishin empesa a lavorar para los proves en la Mayoriya de Varsovia. Se okupa de las kriaturas abandonadas, i mas espesyalmente de las kriaturas djudiyas. Las aze salir del ghetto, sea por un burako en la pared, sea por arabas de chop, sea arabas de tulumbadjis, i despues les aze falsos papeles para yevarlas en famiyas kristyanas.

El govyerno polako de Londres funda en septyembre 1942 una organizasyon yamada Zegota, kargada de ayudar a los djudyos, i embiya paras ke sirven para ayudar i salvar lo mas de djudyos posivle, sovre todo las kriaturas . Es Irena ke se topa kon la karga de okuparse de las kriaturas djudiyas.Su lavoro es de entrar en el ghetto sözde para kontrolar las epidemiyas, de azer salir las kriaturas eskondandolas en validjas transportadas por arabas de tulumbadjis o chopchis, o eskondidos debasho de paltos. Kuando es eya ke los sale en su ambulansya, mete al lado del shoför un grande perro gritalon para ke no se oygan los yorros de las kriaturas …i tambyen para dar espanto a los ke kyeren mirar aryentro de la ambulansya.

De esta manera, va azer salir 2.500 kriaturas. Eskrive en sekreto ande metyo kada kriatura i eskonde su lista en boteyas de vidro basho la tyerra.

Lo ke deviya de afitar afita. En el otonyo 1943, es aferrada por la Gestapo i yevada al prezo de Pawiak, ande es torturada para dizir ande eskondyo las kriaturas. No avla, ama se topa rumpida i lo kedara vida entera, kondenada a kedar kon siya. Es kondenada a muerte por un Tribunal, ama la Zegota merka a los kapidjis i la aze salir de prezo. I agora es eya ke se eskonde astal kavo de la gerra. Despues de la gerra, sovre las 2.500 kriaturas eskondidas, 2.000 van a ser topadas, i unas kuantas van a pueder topar de muevo su haliz famiya.

Por esto Irena Sendler va ser yamada Djusta por Yad Vashem en 1965, ama despues va ser olvidada, asta ke, en Amerika, munchos anyos despues, en 1999, un profesor en el Kansas va meldar un artikolo sovre una mujer ke salvo a 2.500 kriaturas i fue torturada por esto. Demanda a sus elevos de bushkar si es vedra. Bushkan, i se apersiven ke no solo es vedra, ama ke esta mujer dainda bive. Le eskriven, i de uno al otro, esta vez se aze famoza, al punto ke resivyo en 2007 un omenaje del parlamento polako, dekorada, i propozada para el premyo Nobel de la paz. Se muryo un anyo despues, en 2008, a la edad de 98 anyos, antes de pueder ser elejida a este premyo ke por siguro meresiya.

Agora me keda de avlarvos de dos otros polakos, i en primero Jan Zabinski.

Kuando los Almanes entran en Varsovia en 1939, Jan Zabinski se topa ser el direktor del zoo. Ama por modo de los bombardamyentos almanes, lo mas de las moradas de las behemot se topan vaziyas.Kuando empesan las deportasyones de Varsovia en 1942, Zabinski tyene la idea ke puede eskonder a djudyos en su zoo, en las moradas de las behemot. I durante tres anyos, va eskonder aya, unos detras de otros, a syenes de djudyos. El mismo mora en una kaza de dos tabakas en medyo del zoo, i aya eskonde unos vente djudyos. Kuando vyene la rebuelta de la rezistansya polaka de Varsovia en agosto 1944, Zabinski, ke aze parte de esta rezistansya, es aferrado por los almanes i yevado en Almanya. Ama su mujer Antonina kontinua su aksyon de eskondimyento de djudyos. El i su mujer van a ser unos de los primeros a ser yamados djustos por Yad Vashem.

Agora avlaremos de Wladislaw Kowalski, ke era un zabit (koronel) retirado de la armada polaka kuando yegaron los Almanes. El reprezentava la Kompaniya olandeza Philips en Varsovia, lo ke le permetiya un poko de movimyento. En septyembre 1940, topa un chiko djudyo de diez anyos sorreteando soliko en la sivdad. Lo toma ande el, le da a komer, le da falsos papeles i le topa una famiya amiga para guadrarlo. En fevrero 1943, despues de la primera rebuelta del Ghetto (vos akodro ke uvo una primera rebuelta en enero , i ke la grande rebuelta, la sigunda, empeso en Pesah, en avril) en fevrero, dunke, paga a kapidjis a la entrada del ghetto i aze salir a syete djudyos, i despues les topa eskondijos siguros. En novyembre de este mismo anyo 1943, ayuda a una famiya de kuatro personas de Ibizca de ir en un eskondijo en Varsovia.

Despues de la sigunda rebuelta del Ghetto, toma ande el a dodje djudyos i merka madera para fraguar enkondijos basho la tyerra. Los djudyos fabrikan kavayos de madera ke Kowalski se va a vender en la sivdad para pueder merkar komida para sus musafires. I kuando uvo la rebuelta de Varsovia en 1944, Kowalski topo el mahsen de un han derrokado ande se eskondyo el mismo kon 49 djudyos. Kadal diya teniyan para bivir tres kupas de agua, un poko de asukar i unos kuantos hapes vitaminados. Se kedaron aya 5 diyas asta la Liberasyon. Despues de la gerra Kowalski se kazo kon una de las djudiyas ke teniya salvado, i en djuntos se fueron a bivir en Israel.

Vos konti oy la istorya de tres polakos. Ama kale saver ke fueron mas de 6.000 los polakos onorados komo djustos por Yad Vashem. Esto no kyere dizir ke la povlasyon polaka en su jeneralidad ayudo a los djudyos. Fue mismo munchas vezes lo kontraryo. I la istorya del pogrom de Kielce en 1946 ke vos konti al empesijo de mi emisyon no se puede olvidar. Ama todo no es preto o blanko. Indimas si uvo munchos polakos negrinyados, el zahut de estos 6.000 djustos es mas grande.

Agora me keda de desharvos dizyendovos : al djueves ke vyene, si kyere el Dyo!