eSefarad

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion “Shabat a la noche”  de Kol Israel  del siklo ke eya mizma melda despues del Notisiario en Ladino .

PITA DE LODO

En un kazal avía un gevir muy riko. Un día el gevir se murió, se fue arriva al ganeden. A la noche aprontaron una meza muy rika, i el malah Gavriel ampesó a yamar a la djente: “El Sinyor Tal, buyrún, a la meza. El Sinyor Otro, buyrún, a la meza…” I an él no lo yamaron.

El gevir le preguntó al malah Gavriel: “Yo ke so el riko del lugar… Ke tengo tanto bueno… no me stas aziendo la onor?”

Le disho el malah: “Estos todos se trusheron la kumida kon eyos. Tú no trushites nada!”

El gevir l`arrogó ke le dé ventikuatro oras, para trayer su kumida.

El malah Gavriel le disho: “Bueno!”

El gevir se fue en kaza, disho a todos: “Alevantavos! Degoyá gayinas, degoyá kodreros! Orná panes!”

Incheron una arabá yena de todo bueno, i ampesaron a ir para el bet-ahayim. Al kamino avía un trompeso en la kaleja, i una pita se kayó al lodo.

Disho el gevir: “Rekojelda, rekojelda presto! Ke no me manke!”

Después de un poko pasó una mujer ke no komió de munchos días, kon una kriatura en el braso, yorando: “Por el Dio, damé una koza de komer!…”

“Bueno,” disho el gevir, “dalelde la pita de lodo”.

Arivaron al bet-ahayim, an él lo metieron a la tumba i tornaron en kaza kon las arabás yenas.

A la noche el gevir sta asperando ke el malah Gavriel lo yame a la meza.

El malah lo yamó. El s`asentó, i el malah le traye la pita de lodo.

Dize el gevir: “Yo trushi tanto bueno, i tú me stas dando esta pita de lodo?!!”

Le disho el malah Gavriel: “Esto es lo ke trushites kon ti, i esto es lo ke mereses. El zahut ke se aze abasho es lo ke se traye kon sí arriva!”

Kontado por FLORA KABILI – 2006
Notado i redaktado por MATILDA KOEN-SARANO