eSefarad

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion “Shabat a la noche”  de Kol Israel  del siklo ke eya mizma melda despues del Notisiario en Ladino .

LA VENGANSA DEL DJUDIÓ

En la Sigunda Gerra Mundial están viajando de Almania a Pas de Calais kon tren. En el kompartamento están asentadas sesh personas. De una parte están asentados una mujer de unos sesenta anyos kon una ija de dizimueve-vente anyos… una ermozura i un manseviko djudió. Enfrente de eyos están asentados un jeneral almán yeno de sí i otros dos pasajeros, ombres. El manseviko djudió lo está viendo al jeneral ke, komo un puerko, sta asentado ansina…Lo sta viendo i pensando: ‘Komo me puedo vengar yo de éste… Komo me puedo vengar?”

El manseviko ya savía ke denpués de un kuarto de ora van a entrar a un tunel. El ya savía ke en lo ke el tren entra al tunel, automatikamente, se ensienden las luzes. El salió afuera sin azerse apersivir, amató las luzes. Entraron al tunel… todo kedó al eskuro. Ensupitó stan sintiendo el son de un bezo i de un shamar. Ya pasaron el tunel, se ensendió la luz.

El jeneral almán va mirando al uno i al otro: ‘Ke manera de negra djente! Uno de estos ombres akí asentados la bezó a la ija, i el shamar lo kumí yo!”

La madre pensó: ‘A, suyú gameo! La bezaron a mi ija en estando yo akí ke sé la valor del bezo.”

La ija pensó otra manera: ‘En estando yo akí, jeune, fueron, bezaron a mi madre.’

El manseviko djudió no pensó a nada, porké fue él ke se bezó la mano i le dio un buen shamar al jeneral almán.

————————————————–

Kontado por SALVO AMADO – 1998
(Del livro “Kuentos de todos los tiempos – La Sosiedad”, de Matilda Koén-Sarano, vía de publikasión).